ENGKILILI: Dua buah rumah panjai di genturung
pendiau Skrang dalam pelilih mit Engkilili enda ngemendarka Parti Pekereja
Sarawak (SWP) bekimpin di rumah panjai sida kena ngulihka sukung politik napi
pengawa bepilih besai Ke-13 (PRU13) ke deka diatur enda lama agi.
Dua buah rumah panjai ke enda ngemendarka SWP nyadika palan endur ngatur
kimpin iya nya Rumah Empading, Bunu, Skrang enggau Rumah Tawi Ragai, Duri
Bangat, Lidong.
Ku Tuai Rumah Tawi, iya enda ngemendarka raban SWP betuaika Presiden
Larry Sng begulai enggau sekeda orang ke meri licha ba rumah panjai nya laban
enggai ‘ngamahka’ rumah panjai nya ke endang orang kuat Barisan Nasional (BN).
“Aku sigi tegap penemu enggai rumah panjai pegai aku nyadi kelang sida
ngerachun runding nembiak redak aku ke agi kering nyukung BN ti ulih mai projek
pemansang.
“Berindik ari nya, aku enda ngemendarka SWP ti betuaika Larry bekimpin
di rumah panjai aku bagi kali kedua,” ku iya madah ngagai Utusan Borneo,
kemari.
Raban SWP ke bisi datai bekimpin ke rumah panjai nya kelimpah ari Larry
kena ke pukul 5 lemai hari Lima, iya nya ex-Kaban Parlimen Lubok Antu Jawah
anak Gerang sereta bini, Kaban Komiti Tinggi SWP Johnanthan Jalin, Sapit Ketuai
Bagi Menua SWP Engkilili Semijie anak Janting enggau Agnes Chandu.
Tawi madah, sepengudah ninga iya enda ngemendarka parti nya bekimpin,
Larry enggau raban iya lalu mulaika diri.
Hari ke terubah datai pukul 10 malam kena hari Empat tu tadi, raban ke
sama enda memukai datai ke rumah panjai nya lalu duduk ba ruai orang bukai.
“Aku enda mendingka licha nya tang semina meda ari jauh aja lalu sida
berandau dalam petang ke semina ngena lampu pichit.
“Randau sida nadai nerima sambut ari rayat rumah panjai aku. Aku alit
ati nama kebuah sida datai baru ke rumah aku ba tuju ke sama,” ku iya.
Ba pekara ke sama kena malam hari Empat tu tadi, bisi nyadi ba Rh
Empading, Bunu lebuh tuai rumah nya enda ngemendarka raban nya betuaika Datuk
Sng Chee Hua begulai enggau Jawah Gerang ngena ruai iya alai bekimpin.
Taja pan sida mindah ke ruai bukai, randau sida pan enda nerima sambut
ke manah ari peranak rumah panjai nya.
Rumah Empading sebuah rumah panjai ke mayuh agi orang kuat Parti Pesaka
Bumiputera Bersatu (PBB).
Sumber:Borneo Post
